၂၀၂၃ တွင် အကောင်းဘက်သို့ ကွေ့ချိုးမည့်  အာရှဗဟိုဘဏ်များ၏ လုပ်ဆောင်ဖွယ် အလားအလာများ

၂၀၂၃ တွင် အကောင်းဘက်သို့ ကွေ့ချိုးမည့်  အာရှဗဟိုဘဏ်များ၏ လုပ်ဆောင်ဖွယ် အလားအလာများ

TO GET INSTANT UPDATE 
Join Telegram Channel
https://t.me/Guid4U

အာရှဗဟိုဘဏ်များသည် အတိုးနှုန်းကို  မြှင့်တင်ခြင်းဖြင့် ၂၀၂၂ ခုနှစ် ငွေကြေးဖောင်းပွမှုကို တွန်းလှန်ခဲ့ကြသည့် နှစ်တစ်နှစ်ကို ဖြတ်သန်းပြီးသည့်နောက်  လာမည့်နှစ်တွင် ၎င်းတို့၏ စူးစိုက်မှု ပြောင်းလဲသွားဖွယ်ရှိသည်။ ကုန်ဈေးနှုန်းများ အတက်နှေးကွေးလာပြီး နိုင်ငံစီးပွားရေးများသည် ကမ္ဘာ့စီးပွားရေးကျဆင်းမှု၏ သက်ရောက်မှုကို ခံစားလာရသည့်အတွက် ရင်းနှီးမြှုပ်နှံသူများအတွက် အဆင်ပြေအောင် ပြောင်းလဲကြဖွယ်ရှိသည်။

၂၀၂၂ ဒီဇင်ဘာလလယ်တွင် Federal Reserve က ယခုနှစ်တွင် ၇ ကြိမ်မြောက် အတိုးနှုန်း မြှင့်တင်ခဲ့သည်။ 
ဒေသတွင်းရှိ ဗဟိုဘဏ်အများစုသည် မူလသတ်မှတ်ထားသည့် အတိုးနှုန်းကို မြှင့်တင်ရာတွင် အမေရိကန် ဗဟိုဘဏ် ဖြစ်သော US Federal Reserve လောက် မပြင်းထန်ခဲ့ကြချေ။ အကြောင်းမှာ ငွေဖောင်းပွမှုနှုန်းများ မပြင်းထန်သောကြောင့် ဖြစ်သည်။

ငွေလဲနှုန်းများတွင် ကန်ဒေါ်လာမြင့်တက်ခြင်းကြောင့် ရင်နှီးမြှုပ်နှံသူများက ငွေကြေးဓနများကို အမေရိကန်သို့ ပြောင်းရွှေ့အောင် မက်လုံးများ ပိုပေးနေသကဲ့သို့ ဖြစ်နေပြီး အာရှငွေကြေးများအပေါ် ဖိအားကျရောက်နေစေခဲ့သည်။
နိုင်ငံသုံးငွေ တန်ဖိုးလျှော့ချခြင်းနှင့် ဈေးကွက်တွင် ဝင်ရောက်စွက်ဖက်ခြင်း နှစ်မျိုးရောနှောပြီး ငွေကြေးမူဝါဒကိုင်တွယ်သူတို့က တုံ့ပြန်ဆောင်ရွက်ကြသည်။ 
လက်ရှိနိုင်ငံခြားငွေလက်ကျန်ကို တိုးတက်ကောင်းမွန်အောင် ဆောင်ရွက်ခြင်း၊ ပြည်ပကြွေးမြီအပေါ် အားကိုးအားထားပြုခြင်းကို လျှော့ချခြင်း၊ နိုင်ငံခြားငွေ အရံရန်ပုံငွေ ပိုမိုများပြားစေခြင်းတို့ဖြင့် ကျရောက်နေသော ဖိအားကို လျော့ကျစေသည်။

ဒေသတွင်းရှိ နိုင်ငံစီးပွားရေး အများစုတို့တွင် ငွေကြေးဖောင်းပွမှု သက်သာလာသည်။ သို့သော် နိုဝင်ဘာလတွင် တောင်ကိုရီးယားနှင့် တရုတ်တို့၏ ပြည်ပတင်ပို့မှု သိသိသာသာ လျော့ကျခဲ့သည်။
တရုတ်အစိုးရ၏ ကိုဗစ်သုည မူဝါဒဖြင့် ကိုဗစ်ကူးစက်မှုကို တင်းတင်းကျပ်ကျပ် ကိုင်တွယ်မှုကြောင့် ဘေးကျပ်နံကျပ်ဖြစ်နေခဲ့ရာမှ ကိုဗစ်သုည မူဝါဒကို လုံးဝလွှတ်ချလိုက်သဖြင့် စီးပွားရေပြန်လည်ချောင်လည်လာမည်ဟု မျှော်လင့်ရသည်။ ထိုအချက်က ဝယ်လိုအား မြင့်တက်သွားပြီး ကုန်စည်များ၏ ဈေးနှုန်းကို ဆွဲတင်နိုင်ဖွယ် ရှိသည်။ သို့သော် အမေရိကန်နှင့် ဥရောပဈေးကွက်များတွင် ကုန်စည်များအတွက် ဝယ်လိုအား ကျဆင်းလိမ့်မည်ဟု ခန့်မှန်းထားကြသဖြင့် ကုန်စည်များ၏ ဈေးနှုန်းကို ကျဆင်းစေလိမ့်မည် ဖြစ်သည်။
အမေရိကန်ဒေါ်လာ ငွေလဲနှုန်းသည် ၁၉၈၅ ခုနှစ်နောက်ပိုင်း  အမြင့်ဆုံးအဆင့်သို့ တက်လာပြီးနောက် အမေရိကန် ဒေါ်လာသည် အထွတ်အထိပ်သို့ ရောက်ရှိသွားခဲ့ပြီဖြစ်ရာ ထပ်တက်တော့မည် မဟုတ်ဘဲ ပြန်လည်ကျဆင်းလာမည် ဖြစ်သည်။
Morgan Stanley မှ စီးပွားရေးပညာရှင်များက "အမေရိကန် ဒေါ်လာသည် အထွတ်အထိပ်သို့ ရောက်ရှိခဲ့ပြီးသည့်နောက် ၂၀၂၃ တွင် ပြန်လည်ကျဆင်းလိမ့်မည်" ဟု သုံးသပ်သည်။
ထိုသို့ဆိုလျှင် အာရှမှ ဗဟိုဘဏ်များသည် လာမည့်နှစ် ၂၀၂၃ တွင် အတိုးနှုန်းကို ပြင်းပြင်းထန်ထန် တိုးမြှင့်ဖို့ မလိုအပ်တော့ချေ။
"ဈေးကွက်ထဲမှာ အတိုးနှုန်း မြှင့်တင်တဲ့ ဇာတ်လမ်းကို အရေထူနေကြပြီ။ ငွေကြေးလဲလှယ် ရောင်းဝယ်တဲ့ ဈေးကွက်က စီးပွားရေး ကျဆင်းမှု စိုးရိမ်မှုတွေဆီ ပြောင်းသွားပြီ” ဟု Saxo Markets မှ စင်ကာပူအခြေစိုက် ဈေးကွက်မဟာဗျူဟာမှူး Charu Chanana က ပြောကြားသည်။
US Federal Reserve (Fed) က ငွေကြေးမူဝါဒ တစ်ရစ်ပြီးတစ်ရစ် တင်းကျပ်သည့် အမြန်နှုန်းကို လျှော့ချခဲ့သည်။ ကာလတိုအနေဖြင့် အတိုးန‌ှုန်း ၅.၀၀%~၅.၂၅% ဝန်းကျင်တွင် ရပ်ထားလိမ့်မည်။ သို့ဖြစ်ရာ တစ်နှစ်တာကာလအတွင်း အခြေခံ ဒသမ ၅၀၀ (၅%) စုစုပေါင်းမြင့်တက်ပြီးချိန် နောက်နှစ်ဆန်းပိုင်းတွင် အတိုးနှုန်း မြှင့်တင်ခြင်းကို ရပ်လိုက်တော့မည် ဖြစ်သည်။

သို့သော် ငွေဖောင်းပွမှု ဆက်ရှိနေမှာကို ရင်းနှီးမြုပ်နှံသူတွေက  စိုးရိမ်နေကြဆဲဖြစ်သည်။ ထိုသို့ ဆက်ရှိနေသည့်အတွက် အတိုးနှုန်း ထပ်မြှင့်ပေးပြီး ငွေဖောင်းပွမှုကို ဆက်လက်တိုက်ဖျက်ကြလိမ့်မည်။
အာရှတွင် ရင်းနှီးမြုပ်နှံသူများသည် Fed အတိုးနှုန်း အပြောင်းအလဲအပေါ်  နိုင်ငံအသီသီးမှ  ဗဟိုဘဏ်က မည်သို့မည်ပုံ အနီးစပ်ဆုံး ထင်ဟပ်စေသည်ကို စိစစ်သုံးသပ်ကြမည်ဖြစ်သည်။ ငွေကြေးမူဝါဒချမှတ်သူတို့အကြား အနှေးအမြန် ကွဲပြားကြသည်။ အနှေးအမြန်အရ ထိုးထားသည့် ဂီယာချင်း တူချင်မှ တူမည်။ ဂီယာပြောင်းထိုးသည့် အချိန်လည်း ကွဲပြားနိုင်သည်။

တောင်ကိုရီးယားသည် ဂီယာပြောင်းသည့် ပထမဆုံးနိုင်ငံတွေထဲမှာ ပါဝင်နိုင်သည်။ အမေရိကန်ဈေးကွက်နှေးကွေးနေသဖြင့် ပို့ကုန်လျော့ကျသည့် အာရှနိုင်ငံများထဲတွင် တောင်ကိုရီးယား ပါဝင်နေသည်။ အထိခိုက်ဆုံးနိုင်ငံများထဲမှာ ပါဝင်နေသည်။ ငွေကြေးမူဝါဒ တင်းကျပ်ခြင်းကို အခြားနိုင်ငံများထက် ဆောလျင်စွ စတင်ကျင့်သုံးခဲ့သည်။ တောင်ကိုရီးယားဝမ် ကန်ဒေါ်လာနှင့် ငွေလဲနှုန်းတွင် ကျဆင်းနေသည်ကို ဘရိတ်အုပ်ရန် ၂၀၂၁ ဩဂုတ်လတွင် အတိုးနှုန်း မြှင့်တင်ခဲ့သည်။ အိမ်ရာဈေးကွက် အရောင်းအဝယ်များပြီး ဈေးကစားနေသည်ကို အေးအောင် ဆောင်ရွက်ခဲ့သည်။
၂၀၂၁ ဩဂုတ်လမှစ၍ ယခုအထိ အတိုးနှုန်း အခြေခံဒသမ ၂၇၅ မြှင့်တင်ခဲ့သည်။ ဖိလစ်ပိုင်ဘပြီးလျှင် တောင်ကိုရီးယားသည် ဒုတိယအများဆုံးဖြစ်သည်။ 
အိမ်ထောင်စု ကြွေးမြီတွင် တောင်ကိုရီးယားသည် အများဆုံးဖြစ်ပြီး ဂျီဒီပီ၏ ၁၀၅% ရှိသည်။ အိမ်ရာအပေါင်ထား ချေးငွေများတွင် ၈၀% သည် ဗဟိုဘဏ် အတိုးနှုန်းမြှင်တင်ခြင်းကြောင့်  အတိုးနှုန်း အမျိုးမျိုးဖြင့် အတိုးမြင့်တက်သည်။ 
  
ထိုင်းနိုင်ငံသည် အတိုးနှုန်း မြှင့်တင်သည့်ဇာတ်လမ်း ဇာတ်သိမ်းပိုင်းသို့ ရောက်ရှိနေပြီဖြစ်သည်။ ငွေဖောင်းပွမှုနှုန်းသည် ဩဂုတ်လတွင် အမြင့်ဆုံး အထွတ်အထိပ် ၇.၉% သို့ ရောက်ရှိခဲ့ပြီး ပြန်ကျဆင်းသည့်အခြေအနေတွင် ရှိနေသည်။ ထိုင်းဗဟိုဘဏ် Bank of Thailand မျှော်မှန်းထားသည့် ၁%~၃% သို့ ၂၀၂၃ ခုနှစ် မေလတွင် ပြန်လည်ရောက်ရှိမည်ဟု မျှော်လင့်သည်။ Bank of Thailand သည် ၂၀၂၃ ခုနှစ် ဇန်နဝါရီလတွင် အခြေခံဒသမ ၂၅ ကို နောက်ဆုံးအကြိမ်မြှင့်တင်ခြင်းအနေဖြင့် မြှင့်တင်လိမ့်မည်ဟု ထင်ကြေးပေးထားကြသည်။ ထိုအတိုင်း မြှင့်တင်ခဲ့လျှင် အတိုးနှုန်း ၁.၅% ဖြစ်သွားမည်။ 

တောင်ကိုရီးယားနည်းတူ ထိုင်းနိုင်ငံသည်လည်း အိမ်ထောင်စု ကြွေးမြီ မြင့်မားနေသည်။ စက်တင်ဘာလကုန်တွင် ဂျီဒီပီ၏ ၇၅% ရှိသည်။ ပြည်ပပို့ကုန် ထိခိုက်လွယ်သည်။ အထူးသဖြင့် မော်တော်ယာဉ်ကဏ္ဍတွင် ဖြစ်သည်။
Nomura မှ စီးပွားရေးပညာရှင်များ၏ အဆိုအရ အိမ်ထောင်စုကြွေးမြီသည် ကြွေးဝယ်ကတ် credit card များနှင့် တသီးပုဂ္ဂလ ဘဏ်ချေးငွေများဖြစ်သည်။ သို့ဖြစ်ရာ ဗဟိုဘဏ် အတိုးနှုန်းမြှင့်တင်လျှင် ၎င်းချေးငွေများ၏ အတိုးနှုန်းလည်း မြင့်တက်သည်။ 
ပြည်တွင်းသို့ ဝင်ရောက်သည့် ခရီးသွားလုပ်ငန်း ပြန်ကောင်းလာသည်မှာ မြန်ဆန်သော်လည်း ကြီးထွားနှုန်း နှေးနေသည်ကို ပြန်မြန်လာလောက်အောင် မလုံလောက်ချေ။

 အိန္ဒိယသည်လည်း ကမ္ဘာ့စီးပွားရေး နှေးနေခြင်းကြောင့် ထိခိုက်သည်။ နိုင်ငံစီးပွားရေးသည်  ပြည်တွင်းစီးပွားရေးဖြင့် သွားနေပြီး ပစ္စည်းပေးသွင်းကွင်းဆက်သည် တရုတ်ပြည်မှ အိန္ဒိယသို့ အရွှေ့အပြောင်းများ ဖြစ်ပေါ်နေသော်လည်း ကမ္ဘာ့စီးပွားရေး နှေးနေခြင်း၏ ဂယက်ရိုက်ခတ်မှုနှင့် မကင်းချေ။ ငွေကြေးဖောင်းပွမှုသည် ၂၀၂၃ ပထမသုံးလပတ်အထိ ကပ်ငြိနေနိုင်ဖွယ်ရှိသည်။ သို့သော် ကြီးထွားန‌ှုန်းနှေးပြီး ကုန်စည်ဈေးနှုန်းများ နိမ့်ကျခြင်းဖြင့် ငွေကြေးဖောင်းပွမှု ကျဆင်းမည်ဖြစ်ရာ ငွေကြေးမူဝါဒ အတိုးနှုန်းမြှင့်တင်ခြင်း နောက်ဆုံးအချီသို့ ရောက်ရှိနေပြီဟု Nomura မှ စီးပွားရေးပညာရှင်များက ကြိုတင်ခန့်မှန်းထားသည်။ 

အင်ဒိုနီးရှားနှင့် ဖိလစ်ပိုင်ရှိ ဗဟိုဘဏ်များသည် ၂၀၂၃ ခုနှစ်တွင် ငွေကြေးဖောင်းပွမှုကို စောင့်ကြည့်နေနိုင်ဖွယ်ရှိသည်။ ငွေကြေးဖောင်းပွမှုသည် ၎င်းဗဟိုဘဏ်နှစ်ခု ရည်မှန်းသည့် ၂-၄% ကြားသို့ ၂၀၂၄ ခုနှစ်ကျမှ ဆိုက်ရောက်လိမ့်မည်။
ဖိလစ်ပိုင် ဗဟိုဘဏ် Bangko Sentral ng Pilipinas (BSP)က ငွေကြေးဖောင်းပွမှု ၁၄ နှစ်တာအတွင်း အမြင့်မားဆုံးဖြစ်သည့် ၈% သို့ နိုဝင်ဘာလတွင် ရောက်ရှိနေခဲ့သည်မှာ ဒီဇင်ဘာလတွင် အထွတ်အထိပ်သို့ ရောက်မည်ဟု ဆိုသည်။

တရုတ်နိုင်ငံသည် ကိုယ်ပိုင်မူဟန်ဖြင့် ဆက်သွားနေသည်။ ဗဟိုဘဏ် People's Bank of China  က မူဝါဒအတိုးနှုန်းကို ဇန်နဝါရီလတွင် တစ်ကြိမ်၊ ဩဂုတ်လတွင် တစ်ကြိမ် အခြေခံဒသမ ၁၀ စီ လျှော့ချခဲ့သည်။ ဘဏ်များတွင် ထားရှိရမည့် အရန်ငွေ အချိုးအစားကို ဧပြီလတွင် ၇.၈% နှင့် ဒီဇင်ဘာလတွင် ၈.၄% လျှော့ချသတ်မှတ်ခဲ့သည်။ ကမ္ဘာတစ်လွှားမှ ဗဟိုဘဏ်များ၏ လုပ်ဆောင်ပုံနှင့် ပြောင်းပြန် ဖြစ်သည်။ နိုင်ငံစီးပွားရေး ကြီးထွားဖို့ကိုသာ စူးစိုက်ထားသည်။
Source Asia Nikkei 
TO GET INSTANT UPDATE 
Join Telegram Channel
https://t.me/Guid4U