ကန်စီးပွားရေးကိုယ်စားလှယ်အဖွဲ့ မြန်မာလာရောက်မည်

အမေရိကန်အစိုးရ ကိုယ်စားလှယ်အဖွဲ့တခုဟာ အရှေ့တောင်အာရှ ဒေသတွင်း စီးပွားရေး ဖွံ့ဖြိုးတိုးတက်မှုတွေကို တိုးချဲ့ဆောင်ရွက်နိုင်ဖို့အတွက် မြန်မာနိုင်ငံကို လာရောက်မှာဖြစ်တယ်လို့ ရန်ကုန်မြို့မှာရှိတဲ့ အမေရိကန်သံရုံးက မနေ့က သတင်းထုတ်ပြန်လိုက်ပါတယ်။

အမေရိကန်ရဲ့ နိုင်ငံတကာ ဖွံ့ဖြိုးမှုကော်ပိုရေးရှင်း (DFC) ရဲ့ အမှုဆောင်အရာရှိချုပ် Adam Boehler ဦးဆောင်တဲ့ အမေရိကန် ကိုယ်စားလှယ်အဖွဲ့ဟာ မြန်မာအပါအဝင် အင်ဒိုနီးရှားနဲ့ ဗီယက်နမ်နိုင်ငံတွေကို အောက်တိုဘာ ၂၃ ရက်နေ့ကနေ ၂၇ ရက်နေ့အထိ သွားရောက်မှာဖြစ်တယ်လို့ ပြောပါတယ်။

အမေရိကန် ကိုယ်စားလှယ်အဖွဲ့ရဲ့ ဒီ အရှေ့တောင်အာရှ ခရီးစဉ်အတွင်း အစိုးရ အဆင့်မြင့်တာဝန်ရှိသူတွေ၊ စီးပွားရေးလုပ်ငန်းရှင်တွေနဲ့ တွေ့ဆုံပြီး ရင်းနှီးမြှုပ်နှံမှုနဲ့ ဆိုင်တဲ့ အခွင့်အလမ်းတွေကို စူးစမ်းရှာဖွေသွားမှာ ဖြစ်တဲ့အပြင် ဒေသတွင်း ဖွံ့ဖြိုးတိုးတက်မှု၊ စီးပွားရေးတိုးတက်မှုနဲ့ တည်ငြိမ်မှုရှိဖို့အတွက် အထောက်အကူဖြစ်စေမယ့် ပူးပေါင်းဆောင်ရွက်မှုတွေကို တိုးမြှင့်သွားဖို့အတွက် ဆွေးနွေးကြမှာဖြစ်တယ်လို့ ပြောပါတယ်။

အင်ဒို-ပစိဖိတ်ဒေသဟာ DFC အတွက်တော့ ဦးစားပေးရင်းနှီးမြှုပ်နှံမှုဒေသ ဖြစ်တယ်လို့လည်း အဲဒီကြေညာချက်မှာ ပြောထားပါတယ်။

သူ့နဲ့အတူ အမေရိကန်ရဲ့ ပို့ကုန်သွင်းကုန်ဘဏ်ဥက္ကဋ္ဌ Kimberly Reed နဲ့ ဘဏ္ဍာရေးဝန်ကြီးဌာန၊ ကူးသန်းရောင်းဝယ်ရေး ဝန်ကြီးဌာန၊ နိုင်ငံခြားရေးဝန်ကြီးဌာနနဲ့ စွမ်းအင်ဝန်ကြီးဌာနက အကြီးတန်း တာဝန်ရှိသူတွေလည်း ပါဝင်မှာဖြစ်တယ်လို့ ပြောပါတယ်။

ဗီအိုအေ