ဟနွိုင် မြို့ပြ မက်ထရိုရထား စတင်ပြေးဆွဲ

ဗီယက်နမ်နိုင်ငံ မြို့တော် ဟနွိုင်တွင် ဗီယက်နမ်နိုင်ငံ၏ ပထမဆုံးဖြစ်သော မက်ထရိုရထား စတင်ပြေးဆွဲနေပြီဖြစ်သည်။
ဟနွိုင်မြို့သည် မော်တော်ဆိုင်ကယ် များလွန်းသော မြို့ ဖြစ်ပြီး လမ်းလျှောက်သွားလာသော လမ်းသွားလမ်းလာများအတွက် အန္တရာယ် များသည့်အပြင် လေထုညစ်ညမ်းမှု ဖြစ်ပေါ်စေသည်။ မက်ထရိုရထားက မော်တော်ဆိုင်ကယ်အစား ရထားစီးခြင်းဖြင့် မော်တော်ဆိုင်ကယ် သုံးစွဲမှု လျော့ကျစေပြီး လေထုညစ်ညမ်းစေခြင်းကို လျှော့ချပေးနိုင်လိမ့်မည်။
ဟနွိုင်တွင် ၂၀၀၈ ခုနှစ်တွင် မော်တော်ဆိုင်ကယ် ၂ သန်းကျော် ရှိခဲ့ရာမှ ၂၀၂၀ ပြည့်နှစ်တွင် ၅.၇ သန်း သုံးစွဲလျက်ရှိသည်။
ကားစီးရေလည်း တိုးလာသည်။ ၂၀၀၈ ခုနှစ်တွင် ကားစီးရေ ၂၈၅,၀၀၀ ရှိခဲ့ပြီး ၂၀၂၀ ပြည့်နှစ်တွင် ၇၀၀,၀၀၀ ရှိသည်။

ဆောက်လုပ်ရေး ရပ်ဆိုင်းထားရသည့် ကာလများ ရှိခဲ့ခြင်းကြောင့် မက်ထရိုရထား စီမံကိန်းသည် ၁၀ နှစ် ကြာမြင့်ခဲ့သည်။
မြို့လယ်တွင်ရှိသော Cat Linh ဘူတာရုံမှ ၁၃ ကီလိုမီတာ ရှည်လျားသည့် မက်ထရိုရထား ခရီးစဉ် စတင်သည်။ လူဦးရေ ထူထပ်သည့် မြို့အရှေ့ပိုင်းတွင် တည်ရှိသော Ha Dong ဘူတာတွင် အဆုံးသတ်သည်။ ကြားဘူတာ ၁၀ ခု ရှိသည်။

 Cat Linh-Ha Dong ရထားလမ်း စီမံကိန်း ကုန်ကျစရိတ်ကို မူလက အမေရိကန်ဒေါ်လာ သန်း ၅၅၀ သတ်မှတ်ခဲ့သည်။ တကယ်ကုန်ကျခဲ့သည်မှာ အမေရိကန်ဒေါ်လာ သန်း ၉၀၀ နီးပါး ဖြစ်သည်။

ဟနွိုင်တွင် နောက်ထပ် မက်ထရို ရထားလိုင်း ၉ လိုင်း ထပ်တိုးမည်ဖြစ်ပြီး ၂၀၃၀ ပြည့်နှစ်တွင် ပြီးစီးရန် လျာထားသည်။

မြို့မှာ နေထိုင်ကြသူတို့က မော်တော်ဆိုင်ကယ်အစား ရထားကို ပြောင်းလဲသုံးစွဲကြမည် ဆိုသည့် အချက်သည် မသေချာပေ။ ပြောင်းလဲသုံးစွဲဖို့ အချိန်ကြာကောင်း ကြာနိုင်သည်။

ပထမဆုံး မက်ထရို ရထားလမ်းြဖစ်သည့် Hanoi Metro Line 2A ကို ၂၀၁၁ တွင် စတင်သည်။ 
ကုန်ကျစရိတ် အများစုကို တရုတ်အစိုးရ၏ ဖွံ့ဖြိုးအထောက်အပံ့ဖြင့် သုံးစွဲသည်။ 
China Railway Group ၏ လက်အောက်ခံ China Railway Sixth Group က ဆောက်လုပ်ပေးသည်။
ရထားတိုင်းတွင်  ၄ တွဲပါပြီး ခရီးသည် အကြည့်တင်လျှင် ၉၀၀ ဦးအထိ စီးနိုင်သည်။ အမြန်ဆုံး အမြန်နှုန်းမှာ တစ်နာရီ ၈၀ ကီလိုမီတာ ဖြစ်သည်။ ခရိးစဉ် အစအဆုံး ၂၃ မိနစ်ကြာသည်။
 
ဗီယက်နမ်နိုင်ငံ၏ တောင်ပိုင်းမြို့တော် ဟိုချီမင်းတွင်လည်း ဟစ်တာချီနှင့် အခြား ဂျပန်ကုမ္ပဏီများက မက်ထရိုရထားလမ်း ဆောက်လုပ်နေသည်။ 
ဟနွိုင်တွင်လည်း ပြင်သစ်နှင့် အာရှဖွံ့ဖြိုးရေးဘဏ်တို့၏ ဘဏ္ဍာရေး ကျောထောက်နောက်ခံဖြင့် ရထားလမ်းတစ်ခု ဆောက်လုပ်နေသည်။