တစ်လကျော်ကာလ နိုင်ငံခြားသားရင်းနှီးမြှုပ်နှံမှုအမေရိကန်ဒေါ်လာ ၃၃၉ ဒသမ ၇၉ သန်းရရှိ

မြန်မာနိုင်ငံ ရင်းနှီးမြှုပ်နှံမှုကော်မရှင်သည် ၂၀၁၈-၂၀၁၉ ဘဏ္ဍာနှစ်၏ အောက်တိုဘာ ၁ ရက်မှ နိုဝင်ဘာပထမပတ်အထိ နိုင်ငံခြားသားရင်းနှီးမြှုပ်နှံမှုကဏ္ဍ၌ အမေရိကန်ဒေါ်လာ ၃၃၉ ဒသမ ၇၈၉ သန်းနှင့် အလုပ်အကိုင်ပေါင်း ၃၈၈၃ ဦး၊ နိုင်ငံသားရင်းနှီးမြှုပ်နှံမှုကဏ္ဍ၌ အမေရိကန်ဒေါ်လာ ၇ ဒသမ ၃၆၅ သန်းနှင့် အလုပ်အကိုင်ပေါင်း ၁၈၆၈ ဦး ဖန်တီးပေးနိုင်ခဲ့ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်၏ စာရင်းများအရ နိုဝင်ဘာ ၉ ရက်က သိရပါတယ်။

မြန်မာနိုင်ငံ ရင်းနှီးမြှုပ်နှံမှုကော်မရှင်မှ ၁၈/၂၀၁၈ အပါအဝင် နိုင်ငံခြားသား ရင်းနှီးမြှုပ်နှံမှု အဆိုပြုလုပ်ငန်းလေးခု နှင့် အတည်ပြု လုပ်ငန်းသုံးခုခွင့်ပြုခဲ့ပြီး အဆိုပါလုပ်ငန်းများအနက်မှ ကော်မရှင်ဘက်က အဆိုပြုလုပ်ငန်းလေးခု နှင့် အတည်ပြုလုပ်ငန်းတစ်ခု ခွင့်ပြုပေးခဲ့ပါတယ်။ပဲခူးတိုင်းဒေသကြီးရင်းနှီးမြှုပ်နှံမှုကော်မတီမှ အတည်ပြုလုပ်ငန်းတစ်ခု၊ ကယားပြည် နယ်မှအတည်ပြုလုပ်ငန်းတစ်ခု ခွင့်ပြုခဲ့သောကြောင့် စုစုပေါင်း လုပ်ငန်းခုနစ်ခုမှ ရင်းနှီးမြှုပ်နှံမှုပမာဏ အမေရိကန်ဒေါ်လာ ၃၂၁ ဒသမ ၈၆၆ သန်း နှင့် အဆိုပါလုပ်ငန်းများ၌ အလုပ်အကိုင် အခွင့်အလမ်းပေါင်း ၁၀၅၄ ဦး ဖန်တီးပေးနိုင်မည်ဖြစ်ပါတယ်။

အဆိုပြု၊ အတည်ပြုလုပ်ငန်းခုနစ်ခုမှာ စက်မှုကဏ္ဍ၌ တစ်ခု၊ မွေးမြူရေးနှင့်ရေလုပ်ငန်း၌နှစ်ခု၊ ပို့ဆောင်ရေးနှင့်ဆက်သွယ်ရေးကဏ္ဍ၌တစ်ခု၊ အခြားကဏ္ဍ၌တစ်ခု ခွင့်ပြုခဲ့ခြင်းဖြစ်ပါတယ်။မြန်မာနိုင်ငံသား ရင်းနှီးမြှုပ်နှံမှု၌ အဆိုပြုလုပ်ငန်းနှစ်ခု နှင့် အတည်ပြုလုပ်ငန်းရှစ်ခု စုစုပေါင်း ၁၀ ခုကို နိုဝင်ဘာပထမပတ်တွင် ခွင့်ပြုခဲ့ပါတယ်။ ယင်းတို့အနက်ကော်မရှင်မှ အဆိုပြု လုပ်ငန်းနှစ်ခုနှင့် အတည်ပြုလုပ်ငန်းနှစ်ခုခွင့်ပြုခဲ့သည်။

 ဒါ့အပြင် ပဲခူးတိုင်းဒေသကြီး ရင်းနှီး မြှုပ်နှံမှုကော်မတီမှ အတည်ပြုလုပ်ငန်း နှစ်ခု၊ စစ်ကိုင်းတိုင်းနှင့်ကယားပြည်နယ်တို့မှ နှစ်ခုစီ ခွင့်ပြုခဲ့သော်ကြောင့် စုစုပေါင်းလုပ်ငန်း ၁၀ ခု ခွင့်ပြုခဲ့ပါတယ်။ ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၆ ဒသမ ဝ၉၁ သန်းအပါအဝင် ကျပ် (၃၄၅၄၀ ဒသမ ၁၁၆သန်း) ခွင့်ပြုခဲ့ခြင်း ဖြစ်ပြီး အလုပ်အကိုင်အခွင့်လမ်းပေါင်း ၅၉၃ ဦး ဖန်တီးပေးနိုင်ခဲ့ပါတယ်။ ခွင့်ပြုအတည်ပြုခဲ့သည့် လုပ်ငန်း ၁၀ ခုမှာ စက်မှုကဏ္ဍသုံးခု၊ ဟိုတယ်ကဏ္ဍနှစ်ခု နှင့် အခြားကဏ္ဍငါးခုတို့ ခွင့်ပြုခဲ့ခြင်း ဖြစ်ပါတယ်။