မြန်မာနိုင်ငံနှင့် အိမ်နီးချင်းနိုင်ငံများအကြား ကုန်သွယ်ရေးစာချုပ်များ ချုပ်ဆို

ထိုင်းနှင့် နယ်စပ်ကုန်သွယ်မှု အများဆုံး ဆောက်ရွက်နေသည့် မြဝတီနယ်စပ် ကုန်သွယ်ရေးစခန်း အပါအဝင် နယ်စပ်ကုန်သွယ်ရေးစခန်း ခြောက်ခုမှ ကုန်သွယ်မှုပမာဏမှာ ဒေါ်လာ သန်း ၈၀ ကျော်လျော့ကျခဲ့ကြောင်း ကုန်သွယ်ရေး ဦးစိးဌာန၏ နယ်စပ်ကုန်သွယ်မှုဆိုင်ရာ စာရင်းများအရ သိရပါသည်။

၂၀၁၇-၂၀၁၈ ဘဏ္ဍနှစ် ဧပြီ ၁ ရက်မှ ဒီဇင်ဘာ ၂၂ ရက်အထိ နယ်စပ်ကုန်သွယ်ရေးစခန်း အားလုံး၏ စုစုပေါင်း ကုန်သွယ်မှု ပမာဏမှာ ဒေါ်လာ ၅၆၀၄ ဒသမ ရ၆၆ သန်း ရှိပြီး ယခင်ဘဏ္ဍနှစ် ကာလတူထက် ဒေါ်လာ သန်း ၁၇၀ ကျော်ပိုမိုရရှိခဲ့ကြောင်း သိရပါသည်။

နယ်စပ်ကုန်သွယ်မှု ပမာဏ စုစုပေါင်းမှာ ယခင်ဘဏ္ဍနှစ်ကာလတူထက် ပိုမိုခဲ့သော်လည်း မြန်မာ-တရုတ် နယ်စပ်ကုန်သွယ်ရေးစခန်းများဖြစ်သည့် ချင်းရွှေဟော်၊ ကျိုင်းတုံစခန်းများမှာ ကုန်သွယ်မှုလျော့နည်းနေ၍ မြန်မာ-ထိုင်း နယ်စပ်ကုန်သွယ်မှုအများဆုံး ဆောင်ရွက်သည့် မြဝတီနယ်စပ် ကုန်သွယ်ရေးစခန်းအပါအဝင် တာချီလိတ်၊နဘုလယ်/ထီးခီးစခန်းများမှာလည်း ကုန်သွယ်မှုပမာဏ လျော့ကျနေကြောင်း သိရပါသည်။

မြန်မာ-အိန္ဒိယ နယ်စပ်ကုန်သွယ်ရေး စခန်းမှာလည်း ကုန်သွယ်မှုလျော့ကျခဲ့ကြောင်း သိရပါသည်။

၂၀၁၇-၂၀၁၈ ဘဏ္ဍနှစ် ဒီဇင်ဘာ ၂၂ ရက်အထိ ချင်းရွှေဟော်နယ်စပ်စခန်း၏ နယ်စပ်ကုန်သွယ်မှုပမာဏမှာ ယခင်ဘဏ္ဍနှစ် ကာလတူ နယ်စပ်ကုန်သွယ်မှု ပမာဏထက် ဒေါ်လာ ၃၉ သန်းကျော် လျော့နည်းခဲ့သည်။

ထို့အတူကျိုင်းတုံနယ်စပ်စခန်းမှ ဒေါ်လာ ၂ သန်းကျော်၊ မြဝတီမှ ဒေါ်လာခုနှစ်သန်းကျော်၊ ထီးခီးစခန်းမှ ဒေါ်လာ ၆ သန်းကျော်၊ တာချီလိတ်စခန်းမှ ဒေါ်လာ ၆ သန်းကျော်နှင့် တမူးနယ်စပ် ကုန်သွယ်ရေးစခန်းမှ ဒေါ်လာ ၁၇ သန်းကျော်ယခင်ဘဏ္ဍနှစ် ကာလထက် ကုန်သွယ်မှုပမာဏ နှိုင်းယှဉ်ပါက အသီးသီး လျော့ကျခဲ့ကြောင်းသိရပါသည်။

အဆိုပါ နယ်စပ်ကုန်သွယ်ရေး စခန်းများမှ လျော့ကျခဲ့သည့် ကုန်သွယ်မှုပမာဏမှာ စုစုပေါင်း သန်း ၈၀ ကျော်ရှိကြောင်း သိရပါသည်။

ကုန်သွယ်မှု ဆောင်ရွက်ရာတွင် မြန်မာနိုင်ငံမှ လယ်ယာထွက်ကုန်များ၊ တိရစ္ဆာန်ထွက်ပစ္စည်းများ၊ သတ္တုတွင်းထွက်များ၊ သစ်တောထွက်ကုန်များ၊ စက်မှုကုန်ချောများ တင်ပို့ခဲ့ပြီး အိမ်နီးချင်းနိုင်ငံများမှ လူသုံးကုန်ပစ္စည်း၊ လုပ်ငန်းသုံးကုန်ကြမ်းများ၊ ရင်းနှီးမြှုပ်နှံမှု ကုန်ပစ္စည်းများကို မြန်မာနိုင်ငံသို့ တင်သွင်းခဲ့ကြောင်း သိရပါသည်။

မြန်မာနိုင်ငံ၏ ပြည်ပပို့ကုန် ဖွဲ့စည်းပုံမှာ ပင်မထုတ်ကုန် အနည်းငယ် အပေါ်၌သာ မှီခိုအားထားနေရပြီး ယင်းထုတ်ကုန်များမှာ သယံဇာတများ၊ သဘာဝဓာတ်ငွေ့နှင့် စိုက်ပျိုးရေး၊ ရေထွက်ကုန်ပစ္စည်းများ ဖြစ်ကြောင်းသိရပါသည်။

မြန်မာနိုင်ငံနှင့် ဆက်စပ်လျက်ရှိသော အိမ်နီးချင်းနိုင်ငံများနှင့် နယ်စပ်ကုန်သွယ်မှု ပြုလုပ်နိုင်ရန် မြန်မာ-အိန္ဒိယ၊ မြန်မာ-ထိုင်း၊ မြန်မာ-တရုတ်၊ မြန်မာ-ဘင်္ဂလားဒေ့ရှတို့နှင့် နယ်စပ်ကုန်သွယ်ရေး စာချုပ်များ ချုပ်ဆိုထားပြီး ဖြစ်ပါသည်။

တရုတ်၊ အိန္ဒိယ၊ ထိုင်း၊ ဘင်္ဂလားဒေ့ရှ်တို့နှင့် နယ်စပ်ကုန်သွယ်မှုပြုရန်အတွက် မူဆယ်၊ လွယ်ဂျယ်၊ ကန်ပိုက်တီး၊ ချင်းရွှေဟော်၊ တမူး၊ ရိဒ်၊ မြဝတီ၊ တာချီလိတ်၊ ကျိုင်းတုံ၊ ကော့သောင်း၊ မြိတ်၊ နဘုလယ်/ထီးခီး၊ မောတောင်၊ စစ်တွေ၊ မောင်တော၊မယ်စဲ့ စသည့် နယ်စပ်ကူးသန်းရောင်းဝယ်ရေး စခန်း ၁၆ခုကို ဖွင့်လှစ်ထားကြောင်း သိရပါသည်။

နယ်စပ်ကုန်သွယ်ရေး တိုးချဲ့နိုင်ရန်အတွက် ကုန်သွယ်မှုအရ အချက်အခြာကျသည့် ဒေသများတွင် ကုန်သွယ်ရေး စခန်းများ တိုးချဲ့ဖွင့်လှစ်နိုင်ရန် သက်ဆိုင်ရာ နိုင်ငံများနှင့် ညှိနှိုင်းဆောင်ရွက်သွားရန် အစီအစဉ်များရှိကြောင်း သိရပါသည်။