ကုန်ပစ္စည်း ၉ မျိုး မြန်မာစာဖြင့် လေဘယ်ပါရမည်

ကုန်စည်အမျိုးအစား ၉ မျိုးတွင် သုံးစွဲပုံနှင့် ပါဝင်မှုသတင် အချက်အလက် (သို့မဟုတ်) ညွှန်ကြားချက်များ ဖော်ပြသည့် စာရင်း Labelling ကို မြန်မာဘာသာဖြင့် စတင်ပါရှိစေရန် လုပ်ဆောင်သွားမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာန ညွှန်ကြားရေးမှူး ဦးဆွေတင့်ကြူက “ဥပဒေက ထွက်ထားတာ ကြာပါပြီ။ ဒါကို အသုံးပြုဖို့အတွက် ညှိနှိုင်းဆောင်ရွက်ရင်းနဲ့ ဒီအချိန်ထိ ကြာလာတာ။ Labelling ဒီလအတွင်း လောက်တော့ ထုတ်ပြန်နိုင်မှာပါ။ ဒါက အညွှန်းကို မြန်မာလို ထည့်သွင်းဖော်ပြရမှာ ဖြစ်ပါတယ်”ဟု ပြောသည်။

ယင်းကို အောက်တိုဘာလ ၅ ရက်က ရန်ကုန်မြို့ ကုန်သည်စက်မှုအသင်းချုပ် (UMFCCI) တွင် ကျင်းပပြုလုပ်သော ဒုတိယအကြိမ် ကျန်းမာရေးနှင့် ညီညွှတ်ပြီး ဘေးအန္တရာယ်ကင်းရှင်းသော စားသောက်ကုန်များဆီသို့ ဆွေးနွေးပွဲ၌ ၎င်းကပြောခြင်းဖြစ်သည်။

ဦးစားပေးကုန်ပစ္စည်း ၉ မျိုး
******************
အဆိုပါ Labelling အမိန့်ကြေညာစာကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ယခုလအတွင်း ထုတ်ပြန်ပေးမည်ဖြစ်ပြီး ဦးစားပေးကုန်စည် ၉ မျိုးမှာ -
• အစားအသောက်များ၊
• အိမ်သုံးပစ္စည်းများ၊
• ကလေးအသုံးအဆောင်ပစ္စည်းများ၊
• ဆက်သွယ်ရေးသုံးပစ္စည်းများ၊
• လူသုံးကုန်ပစ္စည်းများ၊
• ဆေးဝါးနှင့် ဖြည့်စွက်စာများ၊
• ဓာတုဗေဒပစ္စည်းများနှင့်
• အလှကုန်ပစ္စည်းများ အစရှိသည်တို့ဖြစ်ကြောင်းလည်း ပြောသည်။

အရေးယူဆောင်ရွက်ခြင်း
*****************
ထုတ်ပြန်ပြီးသည့် ၆ လနောက်ပိုင်းတွင်လည်း ဆောင်ရွက်ခြင်းမရှိသည့် လုပ်ငန်းရှင်များကို စားသုံးသူကာကွယ်ပေးရေး ဥပဒေအရ စီမံခန့်ခွဲရေးပြစ်ဒဏ်ဖြင့်လည်းကောင်း၊ ထောင်ဒဏ် (သို့ မဟုတ်) ငွေဒဏ်ဖြင့် အရေးယူဆောင်ရွက်သွားမည်ဖြစ်ကြောင်း သိရသည်။

“ပြည်ပနိုင်ငံတစ်ချို့က အစားသောက်တွေက သူတို့နိုင်ငံရဲ့ ဘာသာစာပေနဲ့ဖြစ်တဲ့အတွက် အချို့ပစ္စည်းတွေက သူတို့နိုင်ငံတွေမှာ အိမ်မွေးတိရစ္ဆာန်အတွက် ထုတ်တဲ့ပစ္စည်းက ကျနော်တို့ နိုင်ငံမှာ စားသုံးနေတာ တွေ့ရတယ်။ ဒီပစ္စည်းက ကိုယ်နဲ့ သင့်တော်လား၊ မသင့်တော်လားဆိုတာ ဘာမှဆုံးဖြတ်လို့ မရဘူး။ ဒါကြောင့် မြန်မာလို ပါရမယ်လို့ ဥပဒေအရ သတ်မှတ်ထားတာရှိတယ်”ဟု ဦးဆွေတင့်ကြူက ပြောသည်။

ရည်ရွယ်ချက်
*********
ထို့အပြင် ဈေးကွက်အတွင်း၌ သုံးစွဲနေသော ကုန်ပစ္စည်းများကို စားသုံးသူများအနေနှင့် အတု၊ အစစ်၊ အရည်အသွေး ပြည့်မီခြင်းရှိ၊ မရှိ ဆိုသည်မှာ သိရှိရန်ခက်ခဲသောကြောင့် ယခုကဲ့သို့ မြန်မာဘာသာဖြင့် ဖော်ပြမည်ဆိုလျှင် စားသုံးသူများအနေနှင့် ရွေးချယ်နိုင်မည်ဖြစ်ကြောင်း ၎င်းက ရှင်းပြသည်။

သတိရှိရန်လို
********
ပြည်ထောင်စုသမ္မတမြန်မာနိုင်ငံတော် ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌဦးဇော်မင်းဝင်းက “ဒီလိုလုပ်ရင်ဆိုရင် ဘာကောင်းမလဲဆိုတော့ ပြည်ပကနေ တရားဝင်တင်သွင်းနေတဲ့ ကုန်ပစ္စည်းတွေက ကျနော်တို့ရဲ့ အသက်အန္တရာယ်ကို ဒုက္ခပေးနေပါတယ်။ ကျနော်တို့ ကြည့်လိုက်လို့ရှိရင် လေဘယ်အညွှန်းက ဘယ်လောက်အရေးကြီးလဲ ဆိုရင် အထူးသဖြင့် ထိုင်းလိုဟာမျိုး တရုတ်လိုဟာမျိုးက ဘာရေးထားမှန်း မသိဘူး။ စားမယ်ဆိုရင် သတိရှိဖို့ လိုလာတယ်”ဟု ပြောသည်။

ဆက်လက်၍ ၎င်းက ” မြန်မာလို ဘာသာရပ်လည်း ပါသင့်တယ်လို့ ကျနော်တို့က ထင်တယ်။ အခက်အခဲတော့ရှိမှာပဲ ဒါပေမယ့် အညွှန်းမှာ မြန်မာဘာသာ၊ အင်္ဂလိပ်ဘာသာ စသည်ဖြင့် အများသိနိုင်တဲ့ဟာ ပါမှသာ ပိုပြီးအဆင်ပြေနိုင်မယ့် အနေအထားကို ရောက်နိုင်မယ်။ ဒါကြောင့်မို့ ဒါလေးကိုလည်း အမြန်ဆုံးအကောင်အထည်ဖော်နိုင်ဖို့ ကြိုးစားတာဖြစ်တယ်” ဟု ပြောသည်။

ယင်းအပြင် ပြည်ပက စံချိန်မမီသော စားသောက်ကုန်ပစ္စည်းများကို တင်သွင်းနေခြင်းကိုလည်း တားဆီးရန် လိုအပ်ကြောင်း ၎င်းက ပြောသည်။

အစားအသောက်များ
*************
မြန်မာဘာသာဖြင့် labelling ကို ဆောက်ရွက်မည့် အစားအသောက်များမှာ -
• အချိုရည်နှင့် ယိုမျိုးစုံ၊
• နို့နှင့် နို့ထွက် ပစ္စည်းအမျိုးမျိုး၊
• အသားနှင့် အသားထွက်ပစ္စည်းအမျိုးမျိုး၊
• ဥနှင့် ဥထွက်ပစ္စည်းအမျိုးမျိုး၊
• စည်သွပ် အစားအစာအမျိုးမျိုး၊
• စားသုံးဆီအမျိုးမျိုး၊
• အသင့်ဖျော်ကော်ဖီနှင့် လက်ဖက်ရည်ထုပ်အမျိုးမျိုး၊
• အသင့်စား ခေါက်ဆွဲထုပ်အမျိုးမျိုး၊
• အရန်သင့်အစားအစာအမျိုးမျိုး အစရှိသဖြင့်ပါဝင်သည်။

အသုံးဆောင်ပစ္စည်းများ
**************
• အိမ်သုံးပစ္စည်းများ၌ အိမ်သုံးလျှပ်စစ်နှင့် အီလက်ထရွန်းနစ် ပစ္စည်းအမျိုးမျိုး၊
• ကလေးအသုံးအဆောင်ပစ္စည်းများ၌ ကလေးလက်တွန်းလှည်း၊ ကလေးလမ်းလျှောက်ကွင်း၊ ကလေးကစားစရာအရုပ်နှင့် ပစ္စည်းအမျိုးမျိုး၊ ကလေးပုခက်အမျိုးမျိုး၊ ကလေးတကိုယ်ရေ သန့်ရှင်းရေးပစ္စည်းအမျိုးမျိုး အစရှိသဖြင့် ပါဝင်ပြီး
• ဓါတုဗေဒပစ္စည်းများ (စိုက်ပျိုးရေးသုံး ဓါတ်မြေသြဇာအမျိုးမျိုး၊ ပိုးသတ်ဆေးအမျိုးမျိုး၊ စားသောက်ကုန်၊ လူသုံးကုန်၊ အလှကုန်များတွင် အသုံးပြုသော ဓါတုပစ္စည်းအမျိုးမျိုး)၊
• အလှကုန်ပစ္စည်းများ (အလှကုန်ပစ္စည်းအမျိုးမျိုး ၊ ဆံပင်ပြုပြင်ရန် သုံးစွဲပစ္စည်းအမျိုးမျိုး)၊
• လုပ်ငန်းသုံးပစ္စည်းကိရိယာများ (စိုက်ပျိုးရေးသုံးပစ္စည်း ကိရိယာအမျိုးမျိုး၊
• ကျန်းမာရေး အထောက်အကူပြု အသုံးဆောင်ပစ္စည်းအမျိုးမျိုး) တို့ ပါဝင်သည်။

စားသုံးသူကာကွယ်ပေးရေးဥပဒေ
********************
ထိုစားသုံးသူကာကွယ်ပေးရေးဥပဒေကို ၂၀၁၄ ခုနှစ်အတွင်း ပြဌာန်းနိုင်ခဲ့သော်လည်း မြန်မာနိုင်ငံ၏ ကုန်ထုတ်လုပ်မှုကဏ္ဍတွင် အခက်အခဲများစွာ ရှိသောကြောင့် ကုန်စည်များပေါ်တွင် ဖော်ပြရမည့် သုံးစွဲပုံနှင့် ပတ်သက်သည့် သတင်း၊ အချက်အလက် (သို့မဟုတ်) ညွှန်ကြားချက်များကို မြန်မာဘာသာဖြင့် ထည့်သွင်းဆောင်ရွက်နိုင်ခြင်း မရှိ၍ ယခုနှစ်အတွင်း၌ အမိန့်ကြော်ငြာစာ ထုတ်ပြန်ပေးရန် လုပ်ငန်းရှင်များ၏ တောင်းဆိုခြင်းကြောင့် ဆောင်ရွက်ရခြင်းဖြစ်သည်။

 irrawaddy