Nippon Paper နှင့် Stora Enso တို့က သစ်ပင်ဖြင့် ဘက်ထရီ ထုတ်မည်

ဂျပန်နိုင်ငံမှ Nippon Paper နှင့် ဖင်လန် မှ Stora Enso တို့သည် ဘက်ထရီကို  ထုတ်လုပ်ရန်အတွက် သစ်ပင်များကို ကုန်ကြမ်းအဖြစ် အသုံးပြုရန် နည်းလမ်းနှင့် နည်းပညာကို တီထွင်ထားကြသည်။
ယခုအခါ တွင်တွင်ကျယ်ကျယ် အသုံးပြုနေကြသော လစ်သီယမ်-အိုင်းယွန်းနှင့် ရှားပါးသတ္တု အသုံးပြုထားသည့် ဘက်ထရီများကို အစားထိုးရန်အတွက် သုတေသနပြုမှုများကို ကမ္ဘာတစ်ဝှမ်းတွင် ပြုလုပ်လျက်ရှိသည်။  စက်မှုလုပ်ငန်းကဏ္ဍသည် ၂၀၄၀ ခုနှစ်တွင်  ပိုမိုဘေးကင်းပြီး သစ်ပင်ကို သုံးစွဲထုတ်လုပ်ထားသည့် ဘက်ထရီများကို သုံးစွဲကြလိမ့်မည်ဟု မျှော်လင့်ရပေသည်။

Nippon Paper က သစ်သားပျော့ဖတ်ကို ဘက်ထရီအဖြစ် အသုံးပြုပြီး လျှပ်စစ်မီးသီးကို စက္ကန့်အတန်ကြာအောင် မီးထွန်းပြခဲ့သည်။ သစ်သားကို နုညက်နေသော ပျော့ဖတ်ကို အသုံးပြုထားသည်။ ၂၀၂၃ တွင် ဒရုံးများတွင် သုံးစွဲနိုင်သော ဘက်ထရီကို ထုတ်လုပ်မည်။ ၂၀၃၀ တွင် စမတ်ဖုန်းများအတွက် ဘက်ထရီကို ထုတ်လုပ်မည်။  ထို့နောက် မော်တော်ယာဉ်သုံး ဘက်ထရီများ ထုတ်လုပ်မည် ဖြစ်သည်။ 

ဖင်လန်မှ Stora Enso က သစ်ပင်ကို ကုန်ကြမ်းအဖြစ် အသုံးပြုထားသော ဘက်ထရီတစ်မျိုးကို မူပိုင်ခွင့် မှတ်ပုံတင်ထားသည်။ ၂၀၂၇ တွင် မော်တော်ယာဉ်သုံး ဘက်ထရီများ ထုတ်လုပ်ရန် ရည်မှန်းချက် ထားရှိသည်။