နိုင်ငံကူးလက်မှတ်ရုံးပြန်ဖွင့် မနက် ၅ နာရီ လာတန်းစီ

၂ လကြာပိတ်ထားတဲ့ နိုင်ငံကူးလက်မှတ်ထုတ်ပေးတဲ့ရုံးတွေဒီနေ့ပြန်ဖွင့်တဲ့အတွက် ရန်ကုန်မြို့က ရုံးရှေ့မှာ လူတွေ ကြိတ်ကြိတ်တိုးတန်းစီပြီး နိုင်ငံကူးလက်မှတ်လာလုပ်ခဲ့ကြပါတယ်။ တချို့က မနက် ၅ နာရီလောက်ထဲ လာတန်းစီနေတဲ့အတွက် ၇ နာရီထိုးချိန်မှာကို လူတွေ အတော်များနေပြီလို့ ဝန်ဆောင်မှုပေးသူတယောက်က ဗီအိုအေကို ပြောပါတယ်။ နိုင်ငံရေး စီးပွားရေး အခြေအနေမကောင်းချိန် ပြည်ပနိုင်ငံတွေထွက်ပြီး ပညာသင်၊ အလုပ်လုပ်ချင်သူတွေ များနေတဲ့အကြောင်း ရန်ကုန်ကလာတဲ့သတင်း ကိုသိန်းထိုက်ဦးပြောပြပါမယ်။

နိုင်ငံ့ဝန်ထမ်းတွေအားလုံး စက်တင်ဘာ ၁၃ ရက်ကစပြီး နေ့တိုင်းရုံးတက်ရမယ်လို့ ကိုဗစ်ထိန်းချုပ်ရေးကော်မတီက သောကြာနေ့က ကြေညာပြီးတဲ့နောက် ဒီနေ့ စက်တင်ဘာ ၁၃ ရက်မှာ တခြားအစိုးရရုံးတွေနည်းတူ ရန်ကုန်မြို့က နိုင်ငံကူးလက်မှတ်ရုံး (Passport ရုံး) ဒီနေ့ပြန်ဖွင့်ပါတယ်။ ရန်ကင်းမြို့နယ်ထဲက Passport ရုံးရှေ့မှာ မနက်အစောပိုင်းထဲက Passport လုပ်ချင်သူတွေ တန်းစီနေကြတယ်လို့ ပတ်စ်ပို့ဝန်ဆောင်မှုပေးနေတဲ့ လုပ်ငန်းရှင်တဦးက ဗွီအိုအေကို ပြောပါတယ်။ သူကိုယ်တိုင်လည်း ဆရာစံလမ်းပေါ်က နိုင်ငံကူးလက်မှတ် ထုတ်ပေးတဲ့ရုံးကို ဒီနေ့သွားခဲ့တာပါ။

“နိုင်ငံရေးအခြေအနေနဲ့ ဘာနဲ့ဆိုတော့ အကုန်လုံးက သိတဲ့အတိုင်းပဲ သွားချင်နေကြတာဗျာ။ ၅ နာရီ လာတဲ့သူလည်းရှိတယ်၊ ၄ နာရီ မထိုးခင်ကတည်းက ရောက်နေတဲ့သူလည်းရှိတယ်၊ အဲဒီလို လာတန်းစီနေကြတာ၊ မနက်ဘက် ၇ နာရီလောက်ဆို လူတွေကအုံနေပြီ အဲဒီနားမှာ။ ပြည်ပမှာ အလုပ်လုပ်ဖို့ဗျာ၊ ထိုင်းတို့၊ စင်္ကာပူတို့၊ အဲလိုမျိုးမှာလုပ်ဖို့၊ အဲဒီလိုလာကြတာများတယ်။ တချို့က အမေရိကားမှာ နေဖို့အတွက်ကို DV ဖောင် လျှောက်ဖို့ အဲလိုမျိုးလာတာ၊ အစုံပါပဲဗျာ။”

မြန်မာနိုင်ငံမှာ စစ်တပ်အာဏာသိမ်း အုပ်ချုပ်နေချိန် နိုင်ငံရေး၊ စီးပွားရေး မတည်မငြိမ်ဖြစ်နေတာကြောင့် ပြည်ပနိုင်ငံတွေကို သွားပြီးအလုပ်လုပ်ချင်သူ၊ ပညာချင်သူတွေ ပိုပြီးများလာပါတယ်။ ကိုဗစ်ကြောင့် Passport ရုံးတွေ ယာယီ မပိတ်ခင် မေလတုန်းကလည်း နိုင်ငံကူးလက်မှတ်ထုတ်ပေးတဲ့ရုံးရှေ့မှာ လူ ၄၀၀၊ ၅၀၀ ကျော်အထိ နေ့တိုင်းရှိကြောင်း သူကပြောပါတယ်။ ၂ လကြာရုံးပိတ်ထားပြီး ပြန်ဖွင့်တဲ့ ဒီနေ့မှာတော့ လာကြသူ ၇၀၀ လောက်ရှိတယ်လို့ ရန်ကုန်နိုင်ငံကူးလက်မှတ်ရုံးရဲ့ တာဝန်ခံတဦးက ဗွီအိုအေကို ပြောပါတယ်။ နေ့လည် ၁၂ နာရီနောက်ဆုံးထားပြီး ဘဏ်ငွေသွင်းရတာဖြစ်လို့ မနက်စောစောလာကြဖို့လည်း သူက အကြံပြုပါတယ်။

“ ဒီနေ့ခန့်မှန်းခြေ ၇၀၀ လောက်ရှိတယ်၊ လူအရေအတွက် ကန့်သတ်ထားတာတော့ မရှိပါဘူး၊ စောစောလေးလာ၊ ပြီးတယ်ခင်ဗျ။”

ပြည်ထောင်စုအဆင့် အဖွဲ့အစည်းတွေနဲ့ တိုင်းနဲ့ ပြည်နယ်အစိုးရရုံးတွေ စက်တင်ဘာ ၁၃ ရက်ကစပြီး နေ့တိုင်းရုံးပြန်တက်ရမယ်လို့ ကိုဗစ်ထိန်းချုပ်ရေး ကော်မတီက ကြေညာထားတဲ့အတွက် နေပြည်တော်၊ မန္တလေးနဲ့ ဒေသတချို့က နိုင်ငံကူးလက်မှတ်ရုံးတွေလည်း ဒီကနေ့ပြန်ဖွင့်ခဲ့ပါတယ်။

မြန်မာနိုင်ငံကနေ နိုင်ငံခြားထွက်အလုပ်လုပ်ကြသူတွေထဲမှာ အိမ်နီးချင်း ထိုင်း၊ မလေးရှားစတဲ့ နိုင်ငံတွေမှာ သွားရောက်အလုပ်လုပ်သူတွေ အများဆုံးဖြစ်ပါတယ်။ မြန်မာအလုပ်သမား ဝန်ကြီးဌာနရဲ့ စာရင်းအရ ပြည်ပထွက်အလုပ်လုပ်နေကြတဲ့ မြန်မာနိုင်ငံသား ၄ သန်းကျော် ရှိပါတယ်။

ဗီအိုအေ