ရွှေလီမှာ ဘဏ်စာရင်းတွေပိတ်တဲ့ ကိစ္စ တရုတ်ဖြေရှင်းဖို့ မြန်မာကုန်သည်တွေ တောင်းဆို

တရုတ်နိုင်ငံ ယူနန်ပြည်နယ်၊ ရွှေလီမြို့က ဘဏ်တွေမှာရှိတဲ့ မြန်မာကုန်သည်တွေရဲ့ ငွေစာရင်းတွေကို တရုတ်အာဏာပိုင်တွေ ရုတ်တရက် ပိတ်လိုက်တဲ့အတွက် ၂ နိုင်ငံတာဝန်ရှိသူတွေ ဖြေရှင်းဖို့ ညှိနှိုင်းနေကြပါတယ်၊

ရွှေလီမြို့က ဘဏ်တွေမှာရှိနေတဲ့ မြန်မာကုန်သည်တွေရဲ့ ဘဏ်စာရင်းတွေကို စိစစ်ဖို့ဆိုတဲ့ အကြောင်းပြချက်နဲ့ မကြာသေးခင်ကပဲ ပိတ်လိုက်တာကြောင့် အမြန်ဆုံးဖြေရှင်းပေးဖို့ မြန်မာတာဝန်ရှိသူတွေနဲ့ ကုန်သည်တွေ ဒီနေ့ပဲ တရုတ်နိုင်ငံက တာဝန်ရှိသူတွေနဲ့ တွေ့ဆုံပြီး တောင်းဆိုလိုက်တာပါ။ ဒီလိုတွေ့ဆုံရာမှာ မြန်မာကုန်သည်တွေရဲ့ ဘဏ်စာရင်းတွေကို စိစစ်ဖို့ရှိနေတဲ့အကြောင်း တရုတ်ဘက်က တုံ့ပြန်ခဲ့တယ်လို့လည်း မူဆယ်ခရိုင် အုပ်ချုပ်ရေး ဒုတိယညွှန်ကြားရေးမှူး ဦးမောင်မောင်သန်းက ဗွီအိုအေကို ပြောပါတယ်။

“တရုတ်ကနေ မြန်မာဘဏ်အကောင့် ပိတ်တဲ့ကိစ္စတွေ ဒါ ရှင်းဖို့ တရုတ်ဘက်နဲ့ ညှိနှိုင်းအစည်းအဝေး ၁ နာရီခွဲကစပြီးတော့ ဆွေးနွေးနေတယ်။ (မူဆယ်) ခရိုင်အုပ်ချုပ်ရေးမှူး ပါတယ်ဗျ၊ ကျန်တာကတော့ ကုန်သည်ကြီးများအသင်းတို့ နကသတို့၊ အကောက်ခွန်တို့လည်း ပါပါတယ်။”

ကုန်စည်ပို့ဆောင်ရေး မပြတ်တောက်ဖို့နဲ့ နယ်စပ်က နှစ်ဘက်ပြဿနာတွေ ညှိနှိုင်းဖို့ ရွှေလီမြို့တော်ဝန်နဲ့ မကြာခင်တွေ့ဆုံ ဆွေးနွေးဖို့ စီစဉ်ထားကြောင်းလည်း ဦးမောင်မောင်သန်းက ပြောပါတယ်။

ဒီကနေ့ ညှိနှိုင်းဆွေးနွေးရာမှာ ပါဝင်ခဲ့သူ တဦးဖြစ်တဲ့ မူဆယ်မြို့က ဆန်ကုန်စည်ဒိုင် ဒုဥက္ကဋ္ဌ ဦးမင်းသိန်းကတော့ ဥပဒေမဲ့ လုပ်ရပ်တွေနဲ့ ဆက်နွယ်မှု ရှိ၊ မရှိ စစ်ဆေးပြီး ကင်းရှင်းကြောင်း အတည်ပြုနိုင်တဲ့ ကုန်သည်တွေရဲ့ ငွေစာရင်းတွေကိုတော့ ပြန်ဖွင့်ပေးမှာ ဖြစ်ကြောင်း တရုတ်နိုင်ငံ တာဝန်ရှိသူတွေက တုံ့ပြန်ခဲ့တယ်လို့လည်း ဗွီအိုအေကို ပြောပါတယ်။

“ဘဏ်အကောင့် ပိတ်ခံရတဲ့သူတွေရဲ့ စာရင်းတွေပေါင်းပြီး အဲဒီစာရင်းတွေ စုစုပြီးတော့မှ ရွှေလီအာဏာပိုင်တွေကို တင်ပြထားတယ်။ ရွှေလီအာဏာပိုင်တွေက တဆင့် ယူနန်ပြည်နယ် အစိုးရထိ တင်ပြပြီးတော့ ဒီအကောင့်တွေကို စိစစ်ပြီး ပြန်လည်ဖွင့်လှစ်ပေးဖို့ အစည်းအဝေး လုပ်တာပါ။ ဗမာဘက်က အကောင့်ကတော့ ခန့်မှန်းခြေ အခု ၁၆၀ လောက်ရှိတယ်။ သူတို့ပြောတာကတော့ ဒီလို မူးယစ်ဆေးဝါးကငွေတွေ ဝင်လာတယ်။ တချို့ကလည်း လောင်းကစားကငွေတွေ ဝင်လာတယ်။ အဲဒီငွေတွေကြောင့် ပြန်စစ်ဆေးချင်တယ်ပေါ့။ တကယ်လို့ လမ်းကြောင်းမှန်က ဝင်လာတယ်။ တရားဝင်တယ်ဆိုရင် ပြန်ဖွင့်ပေးမယ်.. အဲဒီလိုပြောတာပေါ့။”

မြန်မာကုန်သည်တွေရဲ့ တရုတ်နိုင်ငံက ဘဏ်စာရင်းတွေကို အရင်ကလည်း မကြာခဏ ပိတ်လေ့ရှိတတ်ပါတယ်။ ကိုဗစ်ကပ်ရောဂါ ကူးစက်မှုတွေကို ထိန်းချုပ်ဖို့ နယ်စပ်ဒေသ သွားလာလှုပ်ရှားမှုတွေကို တရုတ်နိုင်ငံက ကန့်သတ်ထားတာကြောင့် နေ့စဉ် အမေရိကန်ဒေါ်လာ ၁၂ သန်းလောက် ကုန်သွယ်မှုပမာဏရှိတဲ့ နယ်စပ်ကုန်သွယ်ရေးမှာ ထိခိုက်မှုတွေ ကြုံနေရချိန်မှာပဲ အခုနောက်ထပ် ကုန်သည်တွေ ဘဏ်စာရင်းပိတ်ခံရတဲ့ အခြေအနေနဲ့ ကြုံနေရတာပါ။

တချိန်တည်းမှာပဲ တရုတ်အာဏာပိုင်တွေ အာမခံပေးထားတဲ့ တရုတ်ဆန်ကုမ္ပဏီတခုက မြန်မာဆန်ကုန်သည်တွေဆီက ကျပ်ငွေသန်းပေါင်း ၁၀၀,၀၀၀ ကျော်တန်ဖိုးရှိတဲ့ လိမ်လည်မှု ဖြစ်ပွားခဲတာနဲ့ ပတ်သက်လို့ အရေးယူနိုင်အောင် စီစဉ်နေတယ်လို့လည်း မြန်မာကုန်သည်တွေက ပြောပါတယ်။ သံတမန်ရေးအရ ဖြေရှင်းလို့ မရရင် ဥပဒေကြောင်းအရပါ ဖြေရှင်းဖို့ ပြင်ဆင်ထားတယ်လို့လည်း မြန်မာကုန်သည်တဦးဖြစ်တဲ့ ဦးမင်းသိန်းက ပြောပါတယ်။

“ငွေလိမ်ခံရတဲ့သူတွေကို စာရင်းကောက်မယ်။ စာရင်းရပြီဆိုရင် စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနကို တင်ပြပြီး အကူအညီတောင်းမယ်။ ဒီလို ဒီလိုတော့ ဖြစ်ပါတယ် ဒါတွေကျနော်တို့ကို သံခင်းတမန်ခင်းအရ ဆွေးနွေးပေးပါ။ ဆောင်ရွက်ပေးပါဆိုပြီး မြန်မာနိုင်ငံ တရုတ်သံရုံးကတဆင့် တရားစွဲသင့် တရားစွဲမယ် အကြွေးတောင်းသင့်ရင် တောင်းမယ်။ လိုက်သင့်ရင် လိုက်ရမှာပေါ့။ အဲလိုတော့ စီစဉ်ထားတယ်။”

နယ်စပ်ကုန်သွယ်ရေး၊ တရုတ်နိုင်ငံက အကောင်အထည်ဖော်နေတဲ့ ခေတ်သစ်ပိုးလမ်းမ စီမံကိန်းတွေနဲ့ ပတ်သက်လို့ ပြီးခဲ့တဲ့ မေလထဲမှာတုန်းကလည်း မြန်မာသမ္မတ ဦးဝင်းမြင့်၊ တရုတ်သမ္မတ ရှီကျင့်ပင်တို့ ဆွေးနွေးခဲ့ကြသလို၊ ယူနန်ပြည်နယ် ကူမင်းမြို့က မြန်မာကောင်စစ်ဝန်ရုံး အရာရှိတွေနဲ့ တရုတ်ဒေသခံ အာဏာပိုင်တွေလည်း နယ်စပ်ကုန်သွယ်ရေးဆိုင်ရာ ကိစ္စရပ်တွေကို ဆွေးနွေးခဲ့ဖူးပါတယ်။

တရုတ်နိုင်ငံဟာ မြန်မာနိုင်ငံရဲ့အဓိက ကုန်သွယ်ဖက်တခုဖြစ်ပြီး နှစ်နိုင်ငံကြား ကုန်သွယ်မှုပမာဏဟာလည်း ၂၀၁၉ - ၂၀၂၀ ဘဏ္ဍာနှစ်မှာ အမေရိကန်ဒေါ်လာ ၁၂ ဘီလီယံ (၁၂၁၂၆. ၂၇၈ သန်း) ကျော်ရှိခဲ့ကြောင်း မြန်မာနိုင်ငံ ကုန်သွယ်ရေးဝန်ကြီးဌာနက သတင်းထုတ်ပြန်ထားပါတယ်။