အိမ်နီးချင်းသုံးနိုင်ငံက အလုပ်သမား ၈၀,၀၀၀ ကျော် ခေါ်ယူဖို့ ထိုင်းစီစဉ်

ထိုင်းနိုင်ငံအတွင်း တရားမဝင်လုပ်သားတွေ ဝင်ရောက်မှု လျော့နည်းအောင် ရွှေ့ပြောင်းအလုပ်သမားတွေကို နှစ်နိုင်ငံ သဘောတူမှုစာချွန်လွှာ (MOU) လက်မှတ်ထိုးပြီး အလုပ်သမား ၈၀,၀၀၀ လောက်ကို ပထမဦးဆုံးအသုတ်နဲ့ ခေါ်ယူဖို့ စီစဉ်နေပါတယ်။ မြန်မာ၊ လာအို၊ ကမ္ဘောဒီးယား ၃ နိုင်ငံက အလုပ်သမားတွေကို ၂၀၂၂ ခုနှစ်ဆန်းပိုင်းမှာ စတင်ခေါ်ယူသွားမယ်လို့ ထိုင်းအလုပ်သမားဝန်ကြီးက ပြောဆိုခဲ့ပါတယ်။ 

ကိုဗစ်ကပ်ဘေးကြောင့် အိမ်နီးချင်းနယ်စပ်တွေကို ပိတ်ထားတဲ့ ထိုင်းနိုင်ငံက ၂၀၂၂ ခုနှစ် နှစ်စပိုင်းမှာ ပြန်ဖွင့်ဖို့ ထိုင်းအစိုးရက ရည်မှန်းထားပါတယ်။ နယ်စပ်တွေ ပြန်ဖွင့်ပြီးရင် နိုင်ငံအတွင်း အလုပ်သမား လိုအပ်ချက်ကို ဖြည့်နိုင်ဖို့ MOU နားလည်မှု စာချွန်လွှာနဲ့ မြန်မာ၊ လာအို၊ ကမ္ဘောဒီးယား စတဲ့ ၃ နိုင်ငံက ရွှေ့ပြောင်းအလုပ်သမားတွေကို ခေါ်ယူသွားမယ်လို့ ထိုင်းအလုပ်သမားဝန်ကြီးက ပြောပါတယ်။ ပထမအသုတ်အနေနဲ့ အလုပ်သမား ၈၀,၀၀၀ ခေါ်ယူသွားမယ့် အစီအစဉ်နဲ့ ပတ်သက်လို့ မြန်မာပြည်သားများအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက အခုလိုပြောပါတယ်။
“ထိုင်းအလုပ်သမားဝန်ကြီး Mr Suchart Chomklin ခေါင်းဆောင်တဲ့ အထူးအစည်းအဝေး လုပ်တယ်။ ထိုင်းလုပ်ငန်းရှင်တွေက တောင်းဆိုချက်ပေါ့။ ကျွမ်းကျင်လုပ်သား ရှားပါးမှုကို ထိုင်းနိုင်ငံက ခံနေရတယ်။ ကိုဗစ်ကာလကလည်း ၁၉ လရှိလာပြီ။ ကျွမ်းကျင်လုပ်သား ရှားပါးမှုပြဿနာကို အလျှင်အမြန် ဖြည့်တင်းဖို့ လိုအပ်လာပြီ ဆိုတာကို ထိုင်းအစိုးရက သဘောပေါက်တော့ လုပ်ငန်းရှင်တွေနဲ့ ညှိနှိုင်းဆွေးနွေးပြီးတော့ လာမယ့်ဒီဇင်ဘာလ နောက်ဆုံးပတ်မှာ ပထမဆုံး မြန်မာနိုင်ငံက အလုပ်အကိုင် ရှာဖွေရေးအေဂျင်စီ ၄ ခုနဲ့ စတင်ဆွေးနွေးမယ်။ ၂၀၂၂ လာမယ့်နှစ်ဆန်းပိုင်းတွေမှာ အခြားခြားသော အေဂျင်စီတွေနဲ့ ဆွေးနွေးပြီးတော့ မြန်မာ၊ လာအို၊ ကမ္ဘောဒီးယား အလုပ်သမား ပထမဆုံး ၈၀,၀၀၀ သွင်းမယ်။ နောက်ဆုံးအလုပ်သမား ၄၀၀,၀၀၀ ထိပြည့်အောင် ၃ နိုင်ငံက အလုပ်သမားတွေ သွင်းသွားမယ်။ ထိုင်းအစိုးရရဲ့ ရည်မှန်းချက်ပေါ့။”

MOU နဲ့ လုပ်သားခေါ်ယူရေးအတွက် ထိုင်းနိုင်ငံ ကိုဗစ်ကပ်ရောဂါ ထိန်းချုပ်ရေးဌာနက အတည်ပြုထားကြောင်း ထိုင်းအလုပ်သမားဝန်ကြီးက ပြောဆိုခဲ့ပါတယ်။ ရွှေ့ပြောင်းအလုပ်သမား ခေါ်ယူမှုမှာတော့ ကိုဗစ်ကာကွယ်ဆေး ထိုးနှံပြီးစီးမှုအပေါ်မှာ မူတည်ပြီးတော့ ခေါ်ယူဖို့ ထိုင်းနိုင်ငံဘက်က ရည်ရွယ်ထားပါတယ်။ ထိုင်းနိုင်ငံ တာ့ခ်ပြည်နယ်ထဲက စီးပွားရေးဇုန်တွေမှာ လုပ်သားလိုအပ်ချက်တွေ ရှိတဲ့အတွက် ခေါ်ယူဖို့အတွက် စဉ်းစားခဲ့ကြပေမယ့် ကိုဗစ်ကပ်ဘေးကြောင့် တရားဝင် MOU နှစ်နိုင်ငံသဘောတူမှုနဲ့သာ ခေါ်ယူသွားဖို့ ဆုံးဖြတ်ကြတာတွေရှိကြောင်း ပညာရေးနဲ့ ဖွံ့ဖြိုးတိုးတက်ရေးအဖွဲ့က အလုပ်သမားရေးရာတာဝန်ခံ ဦးမင်းဦးက အခုလို ပြောပါတယ်။
“မဲဆောက်မှာ အထူးစီးပွားဇုန်ဆိုတာ ရှိတယ်။ SEZ တွေမှာ ထိုင်းနဲ့ မြန်မာ နှစ်နိုင်ငံလုံးမှာ အရင်အစိုးရလက်ထက်မှာ စီမံကိန်းဆွဲထားတာ SEZ မှာ အလုပ်သမားတွေ လာလုပ်ဖို့ လုပ်ထားတာ။ ကိုဗစ်ဖြစ်သွားတော့ ပြဿနာတက်ကုန်ရော။ နယ်စပ်ကုန်သွယ်ရေး စီးပွားရေးတွေကျတော့ လွန်ခဲ့တဲ့ ရက်ပိုင်းတုန်းကပေါ့ ဒီကိစ္စနဲ့ပတ်သက်လို့ နယ်စပ်ဖွင့်မယ်၊ အလုပ်သမားတွေကို အခွင့်အလမ်းပေးမယ်၊ အထူးသဖြင့် ရွှေ့ပြောင်းလုပ်သားတွေကိုပေါ့၊ SEZ စပါယ်ရှယ်စီးပွားဇုန်မှာ အလုပ်ပေးမယ်ပေါ့။ စီမံကိန်းနဲ့ပတ်သက်တဲ့ ဒါရိုက်တာတွေ သက်ဆိုင်ရာ အစိုးရတာဝန်ရှိသူတွေ နယ်မြေမှာ ဆင်းစစ်တယ်။ ဒါပေမယ့် အဲဒါဖွင့်မယ်ဆိုရင် စိန်ခေါ်မှုက ပြဿနာက ကိုဗစ်ကိစ္စ ဘယ်လိုထိန်းချုပ်မလဲပေါ့။ တရားမဝင် ပြဿနာကို ဘယ်လိုရှင်းမလဲဆိုတာ အဲဒါကြောင့် တရားဝင်အနေနဲ့ လက်ခံကြမယ်။ အရောင် ၃ ရောင်ခွဲလိုက်မယ်။ ဆေး ၂ လုံးထိုးပြီးသားက အစိမ်းရောင်၊ ဒါကတော့ ဦးစားပေးနံပါတ် ၁ ပေါ့။”

ပထမဆုံးအနေနဲ့ ခေါ်ယူမယ့် လုပ်သားတွေဟာ ကာကွယ်ဆေး ၂ ကြိမ် ထိုးနှံပြီးသား ဖြစ်ရမယ့်အပြင် ကာကွယ်ဆေးထိုးပြီး ၁ လပြည့်ပြီးသား အလုပ်မားတွေ ဖြစ်ရမယ်လို့ ပြောပါတယ်။ အဲဒီအုပ်စုကိုတော့ အစိမ်းရောင်အုပ်စုအဖြစ် သတ်မှတ်ထားပါတယ်။

ဒုတိယအုပ်စုကတော့ ကာကွယ်ဆေး ၂ လုံး ထိုးနှံထားပြီးပေမယ့် ဆေးထိုးပြီးတာ တလမကြာသေးတဲ့ လုပ်သားများ ဖြစ်ပါတယ်။ သူတို့ကိုတော့ ဒုတိယဦးစားပေး အဝါရောင်အုပ်စုအဖြစ် သတ်မှတ်ထားပါတယ်။

တတိယအုပ်စုကတော့ ကာကွယ်ဆေး တကြိမ်ထိုးပြီးသားနဲ့ ကာကွယ်ဆေး မထိုးနှံရသေးတဲ့ အုပ်စုဖြစ်ပြီး သူတို့ကိုတော့ အနီရောင်အုပ်စုအဖြစ် သတ်မှတ်ထားပါတယ်။

နယ်စပ်ဂိတ်တွေ ဖွင့်တဲ့အခါမှာတော့ ပထမဦးစားပေး အုပ်စုကို စတင်ခေါ်ယူသွားမှာ ဖြစ်တယ်လို့ ဆိုပါတယ်။

ထိုင်းနိုင်ငံမှာ တရားဝင်ရော တရားမဝင်ပါ မြန်မာအလုပ်သမား ၃ သန်းထက်မနည်းရှိပြီး တရားမဝင် နေထိုင်နေသူ သိန်းနဲ့ချီ ရှိနေပါတယ်။ ဒီလပိုင်းတွေ အတွင်းမှာလည်း ထိုင်း-မြန်မာ နယ်စပ်လမ်းတွေကနေ မြန်မာနိုင်ငံသားတွေဟာ အလုပ်အကိုင်ရှာဖွေဖို့ နေ့စဉ် ရာနဲ့ချီ အစုလိုက်အပြုံလိုက် တရားမဝင် နည်းလမ်းတွေနဲ့ ဝင်လာနေကြပါတယ်။ ဒါကြောင့် ၁၀ လအတွင်း အထောက်အထားမဲ့ ရွှေ့ပြောင်းအလုပ်သမား ၃၀,၀၀၀ ကျော် ဖမ်းမိတယ်လို့ ထိုင်းအာဏာပိုင်တွေက ပြောဆိုထားပါတယ်။ ဒီအတွက် တရားမဝင် ဝင်လာသူတွေကို လျှော့ချနိုင်ဖို့ နှစ်နိုင်ငံသဘောတူချက် MOU နဲ့ တရားဝင် အလုပ်သမားတွေ ခေါ်ယူနိုင်အောင် ထိုင်းအစိုးရက စီစဉ်ဆောင်ရွက်နေတာ ဖြစ်ပါတယ်။

VOABurmese