တိုင်းဒေသကြီးနှင့် ပြည်နယ်အသီးသီးရှိ လုပ်ငန်းစတင်တည်ထောင်လုပ်ကိုင်လျက်ရှိသည့် အသေးစားနှင့် အလတ်စား (SME) လုပ်ငန်းရှင်များကို ပျိုးထောင်ပေးမည့်အစီအစဉ်တစ်ခုအဖြစ် အကြံဉာဏ်များ ပံ့ပိုးကူညီပေးမည်ဖြစ်ကြောင်း စက်မှုဝန်ကြီးဌာန၊ စက်မှုကြီးကြပ်ရေး နှင့် စစ်ဆေးရေးဦးစီးဌာနထံမှ သိရပါတယ်။
လုပ်ငန်းစတင်လုပ်ကိုင်လျက်ရှိသည့် လုပ်ငန်းရှင်များအနေနှင့် နယ်ပယ်အသီးသီးရှိ ကျွမ်းကျင်ပညာရှင် ၂၁ ဦးထံမှအစားအသောက် ဘေးကင်းလုံခြုံရေး၊ တီထွင်ဆန်းသစ်သည့် နည်းပညာများ၊ စီးပွားရေးစီမံခန့်ခွဲမှုနည်းလမ်းများ၊လူသားအရင်းအမြစ်စီမံခန့်ခွဲမှု၊ သစ်သီးဝလံ နှင့် စိုက်ပျိုးရေးဆိုင်ရာ အရောင်းမြှင့်တင်ရေးနည်းလမ်းများကို အကြံဉာဏ်များ လျှောက်ထားရယူနိုင်ကြောင်း ယင်းဦးစီးဌာနထံမှ သိရပါတယ်။
“အခုလိုအကြံဉာဏ်ပေးမယ့်အစီ အစဉ်ကလည်း ကောင်းပါတယ်။ ဒါပေမဲ့ အကြံဉာဏ်ပေးတာထက် နိုင်ငံတကာအဆင့်မီတဲ့ နည်းပညာသင်တန်းတွေပါ ပံ့ပိုးပေးနိုင်ရင် ပိုအထောက်အကူဖြစ်မှာပါ” ဟု အစပျိုးဆပ်ပြာအဆီ လုပ်ငန်းရှင်တစ်ဦးက ပြောကြားခဲ့ပါတယ်။မိမိအကြံဉာဏ်ရယူလိုသည့် ပညာရှင်နှင့် ရက်ချိန်းရယူလိုပါက စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ဌာနခွဲမှူးဒေါ်အိအိခိုင် ဝ၉-၄၂၃၇၂၁၅၉၀၊ ကြီးကြပ်ရေးမှူးဒေါ်အေးသန္တာ ဝ၉-၄၂၅၀၅၇၇၈၄ တို့ထံ ဆက်သွယ်ဆောင်ရွက်နိုင်ပြီး ပညာရှင်များနှင့် ဆွေးနွေးမှုကို တစ်ကြိမ်လျှင် တစ်နာရီဆွေးနွေးပေးမည်ဖြစ်ကာ ကနဦးသုံးကြိမ်ကို အခမဲ့ဆွေးနွေးပေးမည်ဖြစ်ကြောင်း ယင်းဌာနထံမှ သိရပါတယ်။
အကြံဉာဏ်များပံ့ပိုးခြင်းကို ရန်ကုန်မြို့၊ မရမ်းကုန်းမြို့နယ် အမှတ် ၃၅ ကျိုက် ဝိုင်းဘုရားလမ်း နှင့် မင်းဓမ္မလမ်းထောင့် SME Center၊ မရမ်းကုန်းမြို့နယ် အမှတ် ၅ သလ္လာဝတီလမ်းရှိ Incubation Center နှင့် မြန်မာပလာဇာအနီးရှိစက်မှုကြီးကြပ်ရေးနှင့် စစ်ဆေးရေးဦးစီးဌာနတို့တွင် ပြုလုပ်မည်ဖြစ်ကြောင်း စက်မှုကြီးကြပ်ရေး နှင့် စစ်ဆေးရေးဦးစီးဌာနထံမှ သိရပါတယ်။
The Voice
Sign In with Google