ထိုင်းနဲ့ Travel Bubbles ခရီးသွားလာရေးဆိုင်ရာ သဘောတူညီချက်ရဖို့ နိုင်ငံတချို့ စီစဉ်နေ

ကပ်ရောဂါ ကာလအတွင်း Travel Bubbles လို့ခေါ်တဲ့ အပြန်အလှန် ခရီးသွားလာရေးဆိုင်ရာနှစ်နိုင်ငံ သဘောတူညီချက်တွေကို ထိုင်းနိုင်ငံနဲ့အတူ ရယူဖို့ တရုတ်၊ ဂျပန် အပါအဝင် နိုင်ငံ အတော်များများက စိတ်ဝင်စားနေကြတယ်လို့ ထိုင်းနိုင်ငံက ပြောပါတယ်။

ပြည်ပခရီးသွားတွေကို တဖြည်းဖြည်းချင်း ပုံမှန်အခြေအနေရောက်အောင် ပြန်လည်လက်ခံရေး COVID 19 ထိန်းချုပ်ရေးစည်းမျဉ်းတွေကို လျှော့ပေါ့ပေးဖို့ ထိုင်းနိုင်ငံက စီစဉ်နေချိန်မှာ အခုလို ပြောကြားလိုက်တာလည်း ဖြစ်ပါတယ်။ COVID-19 ကပ်ရောဂါကာလ ခရီး သွာလာမှု လွယ်ကူစေရေး အပြန်အလှန် သဘောတူညီကြမယ့် အချက်တွေကို ဇွန်လ ၂၆ ရက်နေ့ အရှေ့တောင်အာရှနိုင်ငံများ အသင်း အစည်းအဝေးမှာ ထည့်သွင်းဆွေးနွေးသွားဖို့ရှိတယ်လို့ ထိုင်း ဝန်ကြီးချုပ်ရဲ့ လက်ထောက်အရာရှိ Bansarn Bunnag ကြာသပတေးနေ့က ပြောပါတယ်။

ဒီ ရုပ်သံ စည်းဝေးပွဲကို ထိုင်းဝန်ကြီးချုပ် Prayuth Chan-Ocha တက်ရောက်မှာ ဖြစ်ပြီး ထိုင်းနိုင်ငံနဲ့ Travel Bubbles အစီအစဉ်ကို စမ်းသပ်ကြည့်ဖို့ တရုတ်ပြည်တွင်းက ဒေသတစ်ချို့နဲ့ ဂျပန်၊ တောင်ကိုရီးယား၊ ဗီယက်နမ်နဲ့ နယူးဇီလန် နိုင်ငံတွေက ဒီ စိတ်ဝင်စားနေကြတယ်လို့လည်း သူက ပြောပါတယ်။

နိုင်ငံ့စီးပွါးရေးရဲ့၅ ပုံ ၁ ပုံလောက်က ခရီးသွားလုပ်ငန်းကို အားထားနေရတဲ့ ထိုင်းနိုင်ငံမှာ ကိုရိုနာဗိုင်းရပ်စ်ကူးစက်မှုနှုန်းကျဆင်းခဲ့တဲ့ လွန်ခဲ့တဲ့ သီတင်းပတ်တွေအတွင်း အသွားအလာ ကန့်သတ်ထားတာတွေကို ဖြေလျှော့ပေးခဲ့သလို ပြည်တွင်း ခရီးသွားခွင့်ကို ပြန်ခွင့်ပြု ခဲ့ပါတယ်။

တချိန်တည်းမှာပဲ နိုင်ငံအရေးပေါ်အခြေအနေကြေညာထားတာကို ဇွန်လထိ တိုးမြှင့်ထားပြီး နယ်စပ်ဒေသတွေ ပိတ်ထားဆဲ ဖြစ်သလို နိုင်ငံတကာလေယာဉ် ခရီးစဉ်တွေကိုလည်း တားမြစ်ထားပါတယ်။ COVID 19 ကို ထိန်းချုပ်နိုင်ပြီး နိုင်ငံရဲ့ နယ်စပ်တွေကို ပြန်ဖွင့်တဲ့အခါမှာ ထိုင်းနိုင်ငံအနေနဲ့ Travel Bubbles အစီအစဉ်ကို နှစ်နိုင်ငံချင်း သဘောတူညီချက်တွေနဲ့ စတင်သွားဖို့ ဝန်ကြီးချုပ် Prayuth က အရင်က ပြောထားဖူးပါတယ်။

ဒီအစီအစဉ်ကို ကျင့်သုံးမယ့်သက်ဆိုင်ရာ နှစ်နိုင်ငံစလုံးဟာ ကိုရိုနာဗိုင်းရပ်စ် ကူးစက် မှုကို ထိန်းချုပ် ထားနိုင်တဲ့ အခြေအနေမှာရှိဖို့ တော့ လိုအပ်မှာဖြစ်ပါတယ်။ Travel Bubbles အစီအစဉ်အရ ခရီးသွားတွေဟာ နှစ်ပတ်ကြာ Quarantine ကင်းလွတ်ခွင့် ရမှာ ဖြစ်ပါတယ်

VOA